Абай облысында «Ауыл аманаты» бағдарламасы бойынша жеңілдетілген несие алып, өз кәсібін ашқан азаматтар саны көп. Солардың бірі — Абай ауданына қарасты Қарауыл ауылының тұрғыны Дарья Жанболатова. Ол асыл тұқымды 19 сиыр сатып алып, әр түрлі сүт өнімдерін өндіріп отырғанын айтады.
«2023 жылы «Ауыл аманаты» бағдарламасы арқылы 8 млн 300 мың теңге көлемінде жеңілдетілген несие алып, 19 бас сүтті сиыр сатып алдық. Сол кезде 5 сиыр бұзаулы, қалғандары торпақ күйінде болды. Қазіргі таңда мүйізді ірі қара малын өсіріп, сүт өндірумен айналысып отырмыз. Нақты айтқанда, сүттен құрт, қаймақ, май, сүзбе, ірімшік және йогурт секілді өнімдер даярлаудамыз.
Қазір мен және жолдасым ауылда мал бағып, тіршілік кешудеміз. Бұған дейін бізде қарапайым шаруа сиырлары болды. Олар асыл тұқымды сиырлардан аз сүт береді. Кейін «Ауыл аманаты» бағдарламасы арқылы жеңілдетілген несие беріліп жатқанын естіп, сүтті сиыр алайық деп шештік. Қарапайым сиырларды сатып жіберіп, жеңілдетілген несиеге асыл тұқымды гольштейн, сементал және алматылық сиырларды алдық.
Мәселен, асыл тұқымды сиырлар жем-шөбі жақсы болса, күн сайын екі рет сауғанда 16-18 литрден бастап, тіпті 22 литрге дейін сүт береді. Қазіргі таңда 9 сауын сиырдан күніне 100 литр сүт аламын. Себебі 2-3 сиырдың сүтін бұзауы жақсы өссін деп, оларды саумай отырмын», — дейді ол.
Дарья Жанболатованың айтуынша, «Ауыл аманаты» бағдарламасы бойынша қаржы алып, жұмыс істеу өте тиімді.
«Мен бұрын жұмыссыз болып, үйде отырған едім. Үкіметтің жеңілдетілген несиесін алғаннан кейін сүтті сиыр сауып, отбасымызға қосымша табыс түсе бастады. Бірақ жалғыз өзім сиыр сауып, өнімдерін дер кезінде дайындауға үлгермеймін. Сондықтан жаныма бір еркек, бір әйел адамды жұмысқа алуды жоспарлап отырмын. Себебі бұрынғыдай емес, сиыр басы көбейгендіктен істейтін шаруалар да көбейді.
Қазір сүттен шығарылатын құрт, қаймақ, май, сүзбе, ірімшік және йогуртты өзіміздің ауылда сатамыз. Еңбегіміздің жемісін көріп, тиісті қаржымызды тауып отырмыз. Дүкенге апарамыз, немесе үйден арнайы алып кететін тұтынушылар да бар. Табиғи сүт өнімдеріне әрқашан сұраныс бар. Өзім сүттің таза күйінде сатылуына қарсы болып, оны өңдеп сату әлдеқайда пайдалы деп есептеймін. Әсіресе, тапсырыс көп. Бірақ сиырдың саны 9 ғана, сол себепті сүт көлемі аз болып тұр. Алла амандық берсе, келер жылы сиырлардың барлығы төлдесе, өндіріс көлемі артады», — дейді Дарья Жанболатова.
Дарья Жанболатова «Ауыл аманаты» бағдарламасы бойынша құжат тапсырып, қаржы алу қиын болмағанын айтады.
«Жергілікті әкімдікке «Бағдарлама бойынша жеңілдетілген несие алғым келеді» деп бардым. Абай ауданы әкімдігіндегі жігіттер құжатты қалай дайындау керектігін түсіндіріп, жан-жақты көмек көрсетті. Өзіміз қарапайым үйде отырған адамбыз ғой. Өкінішке қарай, құжаттың қыр-сырын көп біле қоймаймыз. Бірақ екі айдың ішінде қомақты несиені қолыма алдым.
«Ауыл аманаты» бағдарламасы бойынша қаржы алғаннан кейін, әр ай сайын несие төлеу кестесін жасап алдым. Негізі бағдарлама бойынша 3 немесе 6 ай сайын да төлеуге болады екен. Бірақ біз үшін ыңғайлы болсын деп, ай сайын төлейтіндей етіп келісімшарт жасадық.
Несиені 6 жылда жауып тастауым керек. Бірақ мен жоспар бойынша тезірек несиені толық төлеп, шаруаны ары қарай дамытуды көздеп отырмын. Қазір аудан ішінде мал бағып отырмыз. Алдағы уақытта жолдасым екеуміз аудан сыртынан жер алып, қора-қопсы салып, сүтті сиырлардың санын көбейтуді жоспарлап отырмыз», — дейді ол.