Қасым-Жомарт Тоқаев АҚШ Президенті Дональд Трамппен телефон арқылы мазмұнды әңгіме өрбітті, деп хабарлайды Alashorda.kz ақпараттық агенттігі Ақордаға сілтеме жасап.
Мемлекеттер басшылары екіжақты күн тәртібі мен халықаралық ахуал, соның ішінде Украина проблематикасы жөнінде пікір алмасты. Қасым-Жомарт Тоқаев биыл қараша айында Вашингтонға жасаған сапары кезінде қол жеткізілген уағдаластықтарды толық іске асыруға ниетті екенін айтты.
Қазақстан Президенті Украина қақтығысын реттеудің күрделі сипатына назар аударды. Өйткені бұл шиеленісте территориялық келіспеушілік басты мәселеге айналып отыр. Сондықтан қазіргі нақты жағдайды ескере отырып, екі жақтың мәмілеге келуі маңызды. Еліміз барлық тарапты төзімділік, икемділік және кәсібилік танытып, бейбітшілік формуласын іздеуді жалғастыруға шақырады. Бұл ретте Қазақстан араағайын емес, бірақ қажет болған жағдайда келіссөз алаңын ұсынуға дайын.
Қасым-Жомарт Тоқаев Дональд Трамптың көшбасшылық қасиеті арқасында бірқатар халықаралық әскери қақтығыс тоқтап, АҚШ-тың ішкі әлеуетін күшейтуде оң нәтижеге қол жеткізілгенін атап өтті. Мемлекет басшысы Америка Президентін өзіне қолайлы уақытта Қазақстанға сапармен келуге шақырды. Бұл екіжақты қарым-қатынастағы тарихи уақиға болатынына сенім білдірді.
Сол күні Дональд Трамп өзінің Truth Social әлеуметтік желісінде былай деп жазды:
«Бүгін таңертең мен Қазақстан Республикасының Президенті Қасым-Жомарт Тоқаевпен хабарластым. Біз жалғасып жатқан қақтығыстарда бейбітшілікті орнатудың маңыздылығын, сондай-ақ елдеріміз арасындағы сауда мен ынтымақтастықты арттыру мәселелерін талқыладық. Бұл елмен қарым-қатынасымыз өте жоғары деңгейде. Келесі жылы Америка Құрама Штаттары G20 саммитін қабылдайды және біз осы аса маңызды іс-шараға, Майами қаласында өтетін саммитке, Қазақстан көшбасшысына қонақ ретінде қатысуға шақыру жолдайтын боламыз».