«Еркек болсаң әйеліңді бұл іске араластырмас едің»: Берденов Жиембайды кешірмеді

Шымкентте қала әкімінің орынбасары Руслан Берденовке жасалған қастандық ісі бойынша сот жалғасып жатыр, деп хабарлайды Tizgin.kz.

Жәбірленуші алғаш рет отырысқа қатысып, онлайн режимінде сөз сөйлеп, оқиға жайлы егжей-тегжейлі баяндап берді. Берденовтің айтуынша, ол айыпталушы Ернар Жиембаймен бар-жоғы үш рет кездескен: екі рет жиналыста, үшінші рет шабуыл жасалған күні. Сөзінше, алғашқы секундтарда кім оқ атқанын түсінбеген, бірақ шабуылшының қолындағы қаруды бірден көрген.

«Мен көлікті айналып өтіп, отыра қалдым. Алғашқы оқ капотты тесіп өтті. Артқы жақтан тағы төрт рет оқ атылды, оның бәрі маған тиді. Ол жақындап келіп, қаруын қайта оқтай бастады. Сол сәтте өзіме «егер қазір тұрмасаң – өлесің» дедім. Жиембай екеуміз арпалысқа түстік, қару оның қолында болды, бірақ мен оның жерге құлағанын естідім. Содан кейін ол қашпақ болып бірнеше қадам жасады, бірақ менің жүргізушім көлігімен келіп, оны қағып өтті. Сол сәтте оның қолында қару жоқ еді», – деді Берденов.

Берденов сондай-ақ Жиембай қашып кеткеннен кейін жанына қыздардың жүгіріп келгенін, ал өзі сол сәтте кәлимасын айтып жатқанын қосты.

Отырыс барысында айыпталушы бірнеше рет кешірім сұрады. Жиембай «мен сізді өлтіретіндей сонша қатыгездік көрсеттім бе?» деді. Берденов «сен өлтіре алмадың, себебі мен қарсылық таныттым» деді. Жиембай «Түрмеден шыққан соң, ер-азамат ретінде алдыңызға келіп, сізден кешірім сұраймын» деген. Берденов «Егер сен еркек болсаң, әйеліңді мұндай лас әңгімелерге араластырмас едің» деп жауап берді.

Берденовтің айтуынша, қазір оның денесінде әлі 61 оқ-дәрі қалдығы бар. Соның бірі жүректен небәрі 13 см жерде, екіншісі – бүйректен 0,3 см жерде, тағы бірі – мойын тұсындағы басты артериядан 0,2 см ғана тұста орналасқан. Ол сондай-ақ дәрігерлерге ота кезінде «бауырды қайтадан құрастыруға» тура келгенін және өкпенің 20 пайызын алып тастағанын нақтылады.

ЖИЕМБАЙДЫҢ СОТЫ

Шымкент қаласы әкімінің орынбасары Руслан Берденовке жасалған қастандық ісі бойынша сот процесі шешуші кезеңге таяды. Қазір тараптардың жарыссөзі өтіп жатыр.Алдыңғы отырыста сараптама қорытындылары жарияланды. Мамандар атыс кезінде айыпталушының аффект жағдайында болмағанын анықтаған. Дегенмен Берденовтің денесінде қанша оқ-дәрі қалдығы қалғаны әлі нақты белгісіз. Сотта негізгі айғақтардың бірі ретінде әкімдік ғимаратындағы бейнабақылау жазбалары көрсетілді. Видеода алғашқы оқ атылғаннан кейін күзетшілердің ғимаратты тастап шыға да, жасырын да алмағаны байқалады. Кейін басшылықтың нұсқауымен жарық өшіріліп, қызметкерлер топ-тобымен сыртқа қашқан.