Еліміздің кейбір ауылдарында дәрігер тапшылығы халықтың дер кезінде медициналық көмек алуына кедергі келтіреді. Бұл мәселені шешу мақсатында іске қосылған «Дипломмен ауылға» бағдарламасы жас мамандардың ауылға келіп жұмыс істеуіне мүмкіндік туғызды. Абай облысына қарасты Бесқарағай ауданының тумасы Салтанат Жасқайратова қазіргі уақытта Қарабас ауылында дәрігер болып қызмет етуде. Ол өзіне «Дипломмен ауылға» бағдарламасы арқылы ауылға жұмыс істеуге мүмкіндік туып, оған алғыс айтады.
«Негізі мен Бесқарғай ауданына қарасты Беген ауылының тумасымын. 2014 жылы Семей медициналық университетіне түсіп, 2021 жылы аталған оқу орнын тәмамдадым. Сол жылы Бесқарағай аудандық ауруханасында еңбек жолымды бастадым. Ал 2023 жылы «Дипломмен ауылға» бағдарламасы аясында Қарабас ауылына ауыстым. Жас маман және жас отбасы ретінде 7 миллион теңге жеңілдетілген несие алып, тұрғын үй сатып алдық. Үйдің жағдайы толықтай жасалған, бұл мен үшін өте ыңғайлы болды.
«Дипломмен ауылға» бағдарламасы жас мамандар үшін үлкен пайда әкелуде. Себебі 7 миллион теңге несие бойынша үстеме пайызы небәрі 0,1 пайызды құрайды. Мысалы, менің ай сайынғы төлемім 40-50 мың теңге шамасында. Мұндай жеңілдетілген несие әр адамға ыңғайлы деп ойлаймын. Несиені өтеу мерзімі 10 жыл болса, мен өзім жұмыс істейтін емханада 3 немесе 5 жыл қызмет көрсетуге міндеттімін. Бұдан бөлек, бір реттік 392 мың теңге төленеді. Бұл сома жыл сайынғы айлық есептік көрсеткішке байланысты өзгеріп отырады.
2021 жылы жұмысқа келгенде, маған аудан әкімі 7 500 теңге төлейтін пәтер берген болатын. Нарықтағы пәтерлердің бағасы 50-60 мың теңге шамасында. Әкімнің қолдауымен мен тек 7 500 теңге төлеп отырдым. Екі жыл жұмыс істегеннен кейін мен «Осы ауылда қаламын» деп шештім. Сондықтан да «Дипломмен ауылға» бағдарламасы арқылы несие алып, үй сатып алдым. Мысалы, егер қалада жұмыс істейтін болсам, ипотека үшін ай сайын 200 мың теңге төлеуім мүмкін еді. Ал ауылдан сатып алған үйіме ай сайын 40-50 мың теңге төлеу өте ыңғайлы. Бұл, әрине, жас дәрігерлер үшін үлкен көмек», – дейді ол.
Салтанат Жасқайратова өз жұмыс істейтін Қарабас ауылындағы емханада 2 мыңнан астам адам тіркелгенін атап өтті. Ол сондай-ақ «Дипломмен ауылға» бағдарламасы ауылдық жерлердегі дәрігер тапшылығын жоюға көмектесетінін айтады.
«Негізі, ауылдың медициналық жағдайын Семей секілді қалалармен салыстыруға келмейді. Бірақ біз қолымыздан келгенше науқастарға көмек көрсетіп, ем-дом жасаймыз. Қазіргі уақытта біздің ауылда лаборатория, рентген, операциялық блоктар және дәріханалар бар. Қаланың іргесінде орналасқандықтан, ауыр науқастарды жедел жәрдеммен Семейге жеткізу мүмкіндігі бар.
Жалпы, «Дипломмен ауылға» бағдарламасы болашақта ауылдағы дәрігер тапшылығын жоюға маңызды ықпал етеді. Себебі қазір жастардың туған жеріне қайтып, жұмыс істеуі тиімді болып отыр. Бұл бағдарлама әсіресе біз сияқты жас отбасыларға тезірек аяғынан тұруға үлкен көмек көрсетуде. Әрине, ауылдағы дәрігер тапшылығы бірден шешілмейді, себебі көптеген адамдар жан-жақты жағдай жасалған қалада жұмыс істегенді қалайды. Бірақ «Дипломмен ауылға» бағдарламасы тұрақты түрде жүзеге асса, ауылдағы дәрігер тапшылығы жақын арада жойылуы мүмкін», – дейді жалпы тәжірибелік дәрігер.
