Қазіргі таңда елімізде «Таза Қазақстан» бағдарламасы аясында түрлі іс-шаралар жүзеге асырылып жатыр. Абай облысында да аталған бағдарлама бойынша нақты жоспарлар әзірленіп, нәтижелі жұмыс жүргізілуде. Бұл туралы облыстық табиғи ресурстар және табиғат пайдалануды реттеу басқармасы Табиғат қорғау бағдарламаларын іске асыру бөлімінің бас маманы Нұрдәулет Мұқашов мәлімдеді.
– Абай облысында «Таза Қазақстан» бағдарламасы бойынша қандай жұмыстар атқарылды?
– Мемлекет басшысы Қасым-Жомарт Тоқаевтың бастамасымен 2024 жылы елімізде «Таза Қазақстан» экологиялық акциясы басталды. Осы орайда Абай облысының мәслихаты 2024-2029 жылдарға арналған Абай облысының табиғат пен экологиялық мәдениетті дамыту іс-қимыл тұжырымдамасын бекітті. Бұл тұжырымдама азаматтардың өмір сүру сапасын және экологиялық жағдайды жақсарту, сондай-ақ халықтың экологиялық мәдениетін арттыру мақсатында түрлі іс-шараларды өткізуге бағытталған.
Биылғы жылдың 8 наурыз бен 25 сәуір аралығында «Таза Қазақстан» республикалық экологиялық бағдарламасы аясында «Жер сағаты», «Мен Қазақстанның экологиялық жағдайын жақсартуға қандай үлес қоса аламын?», «Табиғат біздің қолымызда», «Мөлдір бұлақ», «Таза аймақ», «Болашақты бірге ағаш отырғызамыз», «Кейіпкердің ағаш отырғызуы» сынды акциялар өткізілді.
Сонымен қатар «Таза Қазақстан» бағдарламасы аясында 5 сәуір мен 31 мамыр аралығында санитарлық екі айлық ұйымдастырылды. Абай облысында өткен бұл іс-шараға 250 мың тұрғын қатысып, 111 мың ұйым және 7 887 техника жұмылдырылды.
– «Таза Қазақстан» жобасы дегенде көпшілік көшелер мен ормандарды қоқыстан тазарту деп ойлауы мүмкін. Ал шын мәнінде аталған жобаның негізгі мақсаты не?
– «Таза Қазақстан» жобасының негізгі мақсаты – азаматтардың өмір сүру сапасын жақсартып, халықтың экологиялық мәдениетін қалыптастыру. Бұл жобаны халықты тазалыққа шақыратын ең маңызды бастама деп санаймын. «Таза Қазақстан» бағдарламасы республикалық экологиялық бағдарлама ретінде жұмыс істейді.
– Алдағы уақытта Абай облысында «Таза Қазақстан» жобасы бойынша қандай іс-шаралар жоспарлануда?
– Қазіргі уақытта Абай облысында «Таза Қазақстан» экологиялық мәдениетін дамыту тұжырымдамасын іске асыру жөнінде іс-қимыл жоспары бекітілді. Бұл жоспар 43 іс-шарадан тұрады, оның 32-сі 2025 жылға жоспарланған және 16-сын жүзеге асыру аяқталды. Іс-қимыл жоспарының 2 іс-шарасы ұзақ мерзімді, қалғандары жылдың соңына дейін орындалады. Мысалы, Абай облысында экологиялық құқық бұзушылықтарды анықтайтын видеокамералар орнатылды. Сонымен қатар, ауыл мен қалаларда 57 мың жасыл екпе отырғызылды. Алдағы уақытта қала мен ірі елді мекендерде 13 850 суару және су үнемдеу технологиясы енгізілетін болады.
– Экологиялық мәселелерге кейбір азаматтар жүрдім-бардым қарайды. Азаматтардың экологиялық мәдениетін қалыптастыруда «Таза Қазақстан» жобасы қаншалықты үлес қосты?
– «Таза Қазақстан» бағдарламасы азаматтардың экологиялық мәдениетінің қалыптасуына зор үлес қосқанын айта аламын. Өйткені бағдарлама халықтың экологиялық мәдениетін арттыруды басты мақсат етіп отыр. Аудан әкімдігі мен мемлекеттік мекемелердің ресми сайттарында, облыстық телеарналарда және әлеуметтік желілерде әр түрлі ақпараттар жарияланды. Қазіргі таңда экологиялық мәселелер бойынша 764 өтінім қабылданып, оның 723-і орындалды. Қалған 41 өтінім объективті себептерге байланысты жойылды. Өтінімдерді сапалы орындау бойынша облыс бойынша орташа рейтинг 5 балдан 4,4 балды құрайды. Бұл жақсы көрсеткіш деп есептеймін.
