Қоғамның құқықтық мәдениетін қалыптастыруда аға буынның тәжірибесі мен жастардың белсенділігі өзара сабақтасып келеді. Қордай ауданында ардагерлер қауымы Қазақстан Республикасының жаңа Конституциясының мәні мен маңызын тұрғындарға түсіндіру, оның негізгі қағидаттарын кеңінен насихаттау бағытында белсенділік танытып келеді. Олар кездесулер мен пікір алмасулар барысында Ата Заңның қоғам өміріндегі рөліне тоқталып, азаматтардың құқықтары мен міндеттерін білуінің маңызын жеткізуге үлес қосуда.
Ардагерлердің бұл бағыттағы жұмысы – кейінгі ұрпаққа өмірлік тәжірибе мен азаматтық жауапкершіліктің үлгісін көрсету. Аға буын өкілдері елдің тұрақтылығы, қоғамдық келісім мен заңға құрметтің маңызын түсіндіре отырып, жастарды ел өміріне саналы түрде араласуға шақырады. Олардың пікірінше, Конституцияны білу – тек құқықтық сауаттылықтың көрсеткіші емес, сонымен қатар әр азаматтың қоғам алдындағы жауапкершілігін түсінуінің негізі.
Өз кезегінде аудан жастары да ардагерлер көтеріп жүрген бастамаларды қолдап, Конституциялық құндылықтарды түсінуге және насихаттауға қызығушылық танытып келеді. Бұл – ұрпақтар арасындағы байланысты нығайтып, ортақ мақсат жолында бірлесе әрекет етуге мүмкіндік беретін маңызды үрдіс. Жастардың белсенділігі мен аға буынның тағылымды тәжірибесінің ұштасуы құқықтық мәдениетті қалыптастыруға және қоғамдық келісімді нығайтуға ықпал етеді.
Конституцияда бекітілген адам құқықтары мен бостандықтарын құрметтеу, заң алдындағы теңдік және азаматтық жауапкершілік қағидаттары әрбір азаматтың күнделікті өмірінде көрініс табуы тиіс. Осы құндылықтарды жас ұрпақтың бойына сіңіруде отбасының, білім беру ұйымдарының және қоғамдық институттардың рөлі ерекше. Ал ардагерлердің түсіндіру жұмыстары осы бағыттағы сабақтастықты сақтауға және жастардың ел болашағына деген жауапкершілігін арттыруға қызмет етеді.
Қордай аудандық ардагерлер кеңесі алдағы уақытта да тұрғындар арасында құқықтық сауаттылықты арттыруға, Конституцияның негізгі қағидаттарын түсіндіруге және жастармен бірлескен жұмыстарды жалғастыруға басымдық береді. Өйткені заңды құрметтеу, ел бірлігін сақтау және азаматтық жауапкершілікті сезіну – барша ұрпаққа ортақ міндет.
Әлімбет Біржан, Қордай аудандық ардагерлер кеңесінің төрағасы
