Бір ай бұрын яғни 22 сәуір күні Мәжіліс депутаты Данияр Қасқарауов Алматы облысына қарасты Ұзынағаш ауылындағы базарлар сакнитарлық талапқа сай емес екенін айтып, депутаттық сауал жолдаған болатын, деп хабарлайды Alashorda.kz ақпараттық агенттігі.
Данияр Қасқарауов аудандарды аралап, халықпен кездескенде Ұзынағаш базарына арнайы барған. «Шынын айту керек, ХХІ ғасырда бұл жердегі жүйесіздік пен ретсіздік әбден шегінен шығып кеткен. Сауда сөрелері мен инфрақұрылым нысаны заманауи талапқа сай келмейді. Санитарлық-гигиеналық нормалар өрескел бұзылған, базардың іші толған қоқыс, арық жүйелері бітелген. Ең өзекті мәселенің бірі – автотұрақ жоқ. Соның салдарынан тәулік бойы бітпейтін көлік кептелісі тұрғындарға қолайсыздық туғызуда», - деді Қасқарауов мәжілістің бүгінгі отырысында.
Оның айтуынша, базарда жағдай болмаса да, саудагерлер жаздың аптап ыстығы мен қыстың қақаған аязында жұмыс істеуге мәжбүр
«Базар басшылары тұрақты табыс тауып отырғанымен, инфрақұрылымды жаңғыртуға және жағдайды жақсартуға инвестиция салуға құлықсыз. Ал Ұзынағаш – аудан орталығы әрі Алматы қаласына жақын орналасқан елді мекен. Халық тығыз, сырттан келушілер легі жоғары. Соған қарамастан, базардың қазіргі келбеті ауданның имиджіне кері әсер етіп жатыр. Ауыл халқы да заманауи сауда нысандарына лайық", - деп атап өтті депутат.
Мұндай мәселелер Алматы облысының Талғар, Қарасай аудандарында да бар. Осыған байланысты Қасқарауов сауда министріне депутаттық сауал жолдап, бірнеше ұсыныс жасады. Олар:
Алматы облысының аудан орталықтарындағы базар қызметіне кешенді тексеріс жүргізу;
Санитарлық, өрт қауіпсіздігі және қала құрылысы талабының сақталуына құқықтық баға беру;
Базар инфрақұрылымын жаңғыртуды немесе оны елді мекеннің шет аймағына көшіру мүмкіндігін қарастыру;
Аудан орталықтарындағы базарлар мен сауда нысанына арналған бірыңғай архитектуралық және дизайн код енгізу.
P.S. Мемлекет басшысы Қасым-Жомарт Тоқаев соңғы жылдары «Таза Қазақстан» акциясы туралы айтып, қоршаған ортаны қорғау жайында жиі айтып жүр. Бір қызығы Марат Сұлтанғазиев басқаратын Алматы облысына Президенттің «Таза Қазақстан» бастамасы жетпеген тәрізді. Данияр Қасқарауовтың депутаттық сауалы «Тоқаевтың тапсырмасын Марат Сұлтанғазиев неге орындамай отыр?» деген ойға жетеледі. Бірақ депутат мәселе көтергенмен облыс әкіміне байланысты сұраққа нақты жауап бере алмай, күмілжіп қалды.
