Қазақстанда Олимпиада жеңімпаздарына қанша сыйақы беріледі
Мәдениет және спорт министрі Ақтоты Райымқұлова Токио Олимпиадасында алтын медаль алған спортшыларға қанша сыйақы берілетінін айтты, деп хабарлайды Stan.kz ақпарат агенттігі.
Министрдің сөзінше, жеңімпаздарға 250 мың доллар сыйақы беріледі.
“Үкімет жарлығымен 2020 жылы Олимпиада жеңімпаздары мен олардың бапкерлеріне арналған әр спорт түрінен сыйақы мөлшері бойынша ереже қабылданған болатын. Осы ережеге сәйкес, бірінші орын алған спортшы мен оның бапкеріне 250 мың доллардан беріледі.
Бапкерлерге берілетін төлемақының 10 пайызы сол спортшыны алғаш тапқан бапкерге беріледі. 80 пайызы спортшыны дайындаған бапкерге, қалған 10 пайызы бас бапкерге табысталады”, – деді Райымқұлова.
Ал Олимпиадада күміс алғандарға 150 мың, қола медаль иелеріне 75 мың доллардан тарту етіледі.
Айта кетейік, Токио Олимпиадасы 2020 жылы өтуі керек еді. Бірақ коронавирус пандемиясына байланысты бір жылға кейін шегерілді. Төрт құрлықты біріктіретін дода биылғы 23 шілде мен 8 тамыз аралығында өтеді.
Сайтымыздың мобильді қосымшасын жүктеп алыңыз.
