Құлсары қаласында болған су басулардың салдарын жою мақсатында Жаңаөзен қаласы әкімдігінің қолдауымен арнайы техникамен жабдықталған көмек бригадасы Құлсары қаласына аттанды.
Қала әкімдігінің баспасөз қызметінің мәліметінше, көмек бригадасының құрамында 30-ға жуық техника және 60-қа жуық адамдар бары белгілі болды. Сонымен қатар арнайы жасақ азық-түлік, құрал-саймандармен толық жабдықталған.
Айта кетейік, арнайы техникамен қамтамасыз еткен ұйымдар қатарында «Өзенмұнайгаз», «KazPetroDrilling» АҚ, «Бұрғылау», «МұнайФилдСервис», «Өзенмұнайсервис», «ҚазГӨЗ», «Кен-Құрылыс Сервис» ЖШС және «Өзенжылу», «Өзенинвест», «Өзенэнергосервис» МКК бар.
Сондай-ақ қалалық мәслихат депутаттары, жеке кәсіпкерлер және еріктілер де өз үлестерін қосып жатқаны айтылды.
Естеріңізге сала кетейік, су тасқыны салдарынан Атырау облысынан Маңғыстауға 14 мыңнан астам адам эвакуацияланды.
