Чайлдфри (ағылш. childfree – «баласыз өмір») – бұл саналы түрде балалы болудан бас тартуды насихаттайтын субмәдениет. Бұл термин ер мен әйелге бірдей қолданылады. Саналы түрде балалы болудан бас тарту, шариғат тұрғысынан құпталмайды, деп хабарлайды Alashorda.kz ақпараттық агенттігі.
Мүфтияттың хабарлауынша, бұған төмендегі дәлелдер негіз бола алады:
1. Бұл идеология адам болмысына (фитрасына) қайшы. Үйлену және ұрпақ сүю – табиғи құбылыс. Алла Тағала қасиетті Құранда: «Адам баласы үшін әйелдерді, балаларды, алтын күмістен жиналған қазыналарды, сәйгүліктерді, малдар және егіндерді құмарта сүю әсем көрсетілген. Бұлар – дүние тіршілігінің қызығы», – деп баяндайды.
2. Пайғамбар (оған Алланың салауаты мен сәлемі болсын) сүннетіне қайшы. Неке қию – Пайғамбарымыздың (оған Алланың салауаты мен сәлемі болсын) сүннеті. Оның негізгі мақсаттарының бірі – адамзат тегінің сақталуы мен ұрпақтың жалғасуы.
Пайғамбарымыз (оған Алланың салауаты мен сәлемі болсын): «Сені жақсы көретін әрі көп бала туатын әйелге үйленіңдер. Өйткені мен сендердің көптіктеріңмен қиямет күні басқа үмбетке мақтанамын», – деген.
Исламда балалы болу – ерлі-зайыптыларға ортақ құқық. Сондықтан олардың бірі бала сүюді қаласа, екінші тарап оған тыйым сала алмайды. Тек бала тәрбиесіне дайындалу немесе денсаулықты қалпына келтіру сынды орынды себептермен жүктілікті уақытша кейінге қалдыруға рұқсат етіледі. Мұндай жағдайда ерлі-зайыптылардың өзара келісімі болуы және қолданылатын тәсілдердің денсаулыққа зиян келтірмеуі шарт. Ал тек жауапкершіліктен қашу немесе кедейліктен қорқып жүктіліктен әдейі бас тарту шариғатта құпталмайды. Сондай-ақ ұрпақсыздыққа әкелетін, жүктілікті біржолата болдырмайтын кез келген тәсілдер шариғатта харам болып саналады.
Сонымен қатар чайлдфри идеологиясы отбасы институтын әлсіретіп, қоғам мен ұлттың болашағына кері әсерін тигізеді.
Шешім:
1. Чайлдфри идеологиясы ислам шариғатына, адам табиғатына және неке мақсатына қайшы.
2. Жүктілікті болдырмау немесе кейінге қалдыру тек мәжбүрлі және шариғат талабына қайшы келмейтін жағдайда ғана рұқсат етіледі.
3. Әдейі жүктілікті біржолата болдырмайтын кез келген тәсілдерге тыйым салынады.
