Ақтөбеде осымен үшінші апта қатарынан нөсер жауын толастамай тұр: қалада жылдық мөлшерде жауын-шашын түскен. Жауын бүгін де жалғасып жатыр. Бұл туралы "Диапазон" газеті жазды, деп хабарлайды Alashorda.kz ақпараттық агенттігі.
Әсіресе, кеше қаладағы жағдай айтарлықтай қиындап, нөсер жауын салдарынан қала көшелері қайтадан су басты. Бір сағаттан астам уақыт жауған жаңбыр көптеген көшені өзенге айналдырып, тұрғындарға айтарлықтай қиындық туғызды.
Тұрғындар тобықтан келетін суды кешіп өтуге мәжбүр болды, ал көліктер үлкен шалшықтар арқылы әрең қозғалды.
Әсіресе қаланың орталық бөлігіндегі «Нұрдәулет» аялдамасы маңындағы жағдай күрделі болды. Онда жиналған су жаяу жүргіншілер жолын толықтай басып, тұрғындардың өтуіне мүмкіндік бермеді. Жаяу жүргіншілер өткелі де су астында қалды.
Тұрғындардың айтуынша, кейбір көшедегі арықтар толып кетіп, су ақпай қалған. Соның салдарынан жауын суы тұрғын үйлердің аулаларына жайылған. Кей жерде кәріз және нөсер суын ағызу жүйелері судың мол көлеміне төтеп бере алмады.
Сонымен қатар, тұрғындар қаладағы жағдайдың барлық жерде бірдей болмағанын айтады. Сәңкібай батыр даңғылы мен Мәңгілік Ел даңғылында қозғалысқа айтарлықтай кедергі болмаған. Ал Әбілқайыр хан даңғылы маңындағы орталық көшелерде жағдай әлдеқайда ауыр болған.
Қала әкімдігінің мәліметінше, соңғы үш апта ішінде Ақтөбеде жылдық мөлшерге жуық көлемде жаңбыр жауған. Бұл қаланың нөсер суын ағызу жүйесіне үлкен салмақ түсірген.
Кеше коммуналдық қызметтер су сору жұмыстарын жүргізді. Қала көшелерінде көптеген арнайы техника жұмыс істеді. Әкімдік дерегіне сәйкес, жұмыстарға 110 ассенизаторлық көлік, 5 сорғы станциясы және бірнеше мотопомпа жұмылдырылды. Ең алдымен көшелер мен жолдардағы су шығарылды. Жауын суын ағызу үшін 30 арнайы орын белгіленген.
Бүгін қала тұрғындарына бұршақ пен қатты екпінді жел болуы мүмкін екені ескертілді. Синоптиктер мен құтқарушылар қала тұрғындарын барынша сақ болуға, алыс сапарларға шықпауға және дауылды жел кезінде ағаштардың астын паналамауға шақырды.
