Қарағанды облыстық Абай атындағы балалар кітапханасында этноконструктор құрастыру бойынша шеберлік сабағы өтеді. Шағын модель көшпенділердің шынайы баспанасына барынша ұқсас етіп жасалған, деп хабарлайды Alashorda.kz ақпараттық агенттігі.
Мини-киіз үйді құрастыруға арналған шеберлік сабағына кітапхана 11 желтоқсан күні сағат 11:00-де шақырады. Қатысу барлық келушілер үшін тегін болады.
Шеберлік сабағына өзіңізбен бірге ештеңе алып келудің қажеті жоқ: қажетті заттардың бәрі кітапханада беріледі.
– Конструктор нағыз киіз үйдің негізгі элементтерін көрсетеді: кереге, уық, шаңырақ және негізгі сәндік бөлшектер. Пропорциялар мен материалдар оқу жиынтығы форматына бейімделген, бірақ құрастыру принципі мен киіз үйдің құрылысы мүмкіндігінше анық көрсетілген. Балалар мен ересектер дәстүрлі киіз үйдің қалай жасалғанын және оны қандай бөліктер құрайтынын көре алады, – дейді Абай атындағы кітапхананың директоры Баян Уатаева.
Шеберлік сабағында қолданылатын этноконструкторлар көп мәрте пайдалануға арналған. Сол себепті құрастырылған киіз үйді кітапханада қалдыруға тура келеді. Осылайша оның құрылымымен басқа да келушілер таныса алады.
