Непалда коммунистер мен центристер үкіметі құлатылғаннан кейін, әлеуметтік желі Discord-тағы наразылыққа қатысушылардың бастамасымен Сушила Карки уақытша премьер-министр болып сайланды. Ол бұл қызметке 12 қыркүйек, жұма күні кірісті. , деп хабарлайды Alashorda.kz ақпараттық агенттігі bbc.com сайтына сілтеме жасап.
Сушила Карки тағайындалғаннан кейінгі алғашқы жариялы сөзінде жарты жылдан кейін, елде сайланған үкімет пайда болған соң, отставкаға кететінін мәлімдеді.
"Мен бұл қызметті қаламадым. Мені бұл қадамға көшедегі халықтың үні итермеледі", — деді Карки.
73 жастағы Карки — Непал Жоғарғы сотының бұрынғы төрайымы. Ол премьер-министр қызметіне «Z буыны» деп аталатын, жасы шамамен 30-дан төмен азаматтардың талабымен келіскен.
"Біз Z буынының ойлауына сай жұмыс істеуіміз керек. Бұл — жемқорлықты тоқтату, жақсы басқаруды орнату және экономикалық теңдікті қамтамасыз етуді талап етеді", — деді Сушила Карки.
Непалда жаңа сайлау 2026 жылдың 5 наурызына жоспарланған.
Экс-премьер-министр, Коммунистік (біріккен марксистік-лениндік) партияның жетекшісі Кхадга Прасад Шарма Оли өткен аптада екі күнге созылған жаппай көше наразылықтарынан кейін отставкаға кетті. Соңғы мәліметтер бойынша бұл наразылықтар барысында 72 адам қаза тапқан. Наразылықтарға Непалда әлеуметтік желілерге тыйым салу түрткі болған.
Шарма Олидің отставкасынан кейін де наразылықтар тоқтамады: шерушілер бірнеше саясаткердің үйлерін қиратты және парламент ғимаратын өртеп жіберді.
Бір кездері сыбайлас жемқорлыққа қарсы күрескер ретінде танылған Сушила Каркидің кандидатурасы бірнеше үміткердің арасынан Discord желісінде таңдалды.
Discord-тағы чат-топтар «серверлер» деп аталады. Солардың бірі — «Хами Непал» атты қайырымдылық ұйымының серверінде Карки таңдалды. Бұл сервер наразылықты ұйымдастырушылардың мінберіне айналып, соңғы күндері қатысушылар саны 140 мыңнан асып кетті.
Дегенмен, наразылыққа шыққандар жастар әскердің келісімінсіз премьер-министрді тағайындай алмады. Сондықтан серверде дауыс беруден кейін Каркидің кандидатурасы президентпен және қарулы күштердің қолбасшысымен келісілді.
Сушила Карки 2009–2017 жылдары Жоғарғы соттың судьясы болып жұмыс істеді, ал соңғы жылында оны басқарды. Отставкаға кеткеннен кейін ол екі кітап жазды: «Судья» атты автобиография және «Түрме» атты роман.
Карки — Непал Жоғарғы сотын басқарған алғашқы әйел, ал енді ел тарихында алғаш рет премьер-министр қызметіне тағайындалған әйел атанды.
Енді Карки мен оның үкіметінің алдында оңай емес міндеттер тұр: құқықтық тәртіпті қалпына келтіру, парламент ғимаратын және наразылық кезінде қиратылған басқа да ғимараттарды қайта тұрғызу, сондай-ақ «Z буынын» сабырға шақырып, олардың талап етіп отырған өзгерістерінің елде міндетті түрде жүзеге асатынына сендіру.
